Timurido arquitectura

El timurido arquitectura fue un importante etapa na el arquitectonico historia de Irán y Central Asia a maga final del maga aca-14 y aca-15 siglo. Ya supervisa el Timurido Imperio (1370–1507), fundao por si Tamerlan (1336–1405) y conquistando con el mayoria del region, con un cultural renacimiento. Na el arquitectura, ya patrocina el timurido dinastia con el construccion de maga palacio, maga mausoleo y maga religioso monumento na todo el region. Distinguio tal arquitectura por el de suyo gran escala, lujoso decoracion na maga azulejo y maga sofisticao geometrico boveda. Ya difundi este arquitectonico estilo, junto con otro maga aspecto del timurido arte, a traves del imperio y subsiguientemente ya influencia con el arquitectura de otro maga imperio desde el Medio Oriente hasta el indio subcontinente.

El mausoleo Gur-e Amir na Samarcanda, que ta contene con el tumba de si Tamerlan (f. 1405), el fundador del Timurido Imperio.

Maga caracteristica

Véanse también: Arquitectura de Irán y Islamico arquitectura.

Ejemplo del decoracion na maga azulejo al Shah-i-Zinda na Samarcanda (maga final del maga aca-14 y aca-15 siglo).

Ya continua el timurido arquitectura con el tradicion del arquitectura del Ilkanato, construyendo con maga monumento con un escala sin precedente y fastuoso decoracion destinao a impresiona, pero ademas refinando con maga anterior diseño y tecnica. Ya recluta el maga timurido gobernante con el maga mejor artesan del de ellos maga conquistao territorio o incluso ya obliga con ellos a muda al timurido capital.

Acanalao bulboso cupula al mezquita de Bibi Janum na Samarcanda (1399–1405).

El ladrillo fue el principal materia de construccion, como durante maga previo periodo na el region. Para cubri con maga grand superficie de ladrillo con colorio decoracion, ya utiliza maga artesano con el tecnica de mosaico de banna’i para crea con maga geometrico patron y maga cufico inscripcion a un relativamente bajo costo. mientras que ya segui el uso de mas caro mosaico de azulejo, desarrollao na maga anterior periodo, para maga mas curvilineo floral patron. Favorecio el maga azulejo na el exterior por mas resistente al intemperie. Na el interior, na manada situacion, cubierto el maga pared por un yeso como papel maché pintao, dorado y tallao con maga relieve. Na algun maga monumento, usao tambien el maga panel de marmol.

Ademas ya marca maga prominente cupula con manada timurido religioso monumento. Por lo general, son de doble capa, que ta consisti na un interior cupula (visible desde el interior) y un mas alto exterior cupula (visible desde el exterior). Na el exterior, ta reposa el maga cupula na un alto cilindrico tambor y ta tene con un bulboso cupula (i.e. abultao na el maga lado y puntiagudo na el superior parte). Cubierto ellos por decoracion de azulejo, predominantemente de turquesa, y tiene vez ta tene ellos con acanaladura.

Interior del cupula del mausoleo Gur-e Amir, mostando con el transicion entre el cuadrao camara abajo y el redondo cupula arriba.

Na el interior, ya diferi el estructural soporte del maga timurido cupula del maga anterior irani cupula. Tradicionalmente, ya reposa el maga cupula na un octagonal base formao por cuatro maga trompa transicionando del cuadrao camara abajo. Na el maga timurido monumento, ta soporta el cupula un conjunto de maga arco construio sobre el maga borde del cuadrao camara. Ta logra maga trompa al maga esquina con el transicion entre el cuadrao sala de abajo y este maga arco de apoyo de arriba, mientras que na cuanto al maga chico espacio entre el maga cumbre del maga arco, ocupao este maga por maga concavo enjuta, que ta uni para forma con un mas circular base para el cupula mismo de arriba. Ansina mucho mas dinamico el vertical transicion entre el camara y el cupula.

Boveda de maga trompa dentro del mausoleo de Gawhar Shad na Herāt (maga principio del aca-15 siglo).

Otro importante timurido inovacion fue el mas sofisticao y fluido arreglo del maga geometrico boveda na general. Ya dividi maga cruzante boveda de cruceria con maga grande boveda na mas chico boveda. Entonces dividio mas tal maga boveda, o llenao por mocarabe y otro maga tipo de decoracion. Ya queda el mocarabe (tambien conocio como escultura de "estalactita" o "panal") mas complejo que antes por el uso de maga mas chico individual celda para crea con el maga tridimensional geometrico forma. Lograble un visual equilibrio por el alternacion de dos maga tipo o patron de decoracion entre el maga diferente subdivision del boveda. Combinando con este tecnica de boveda —tambien conocio como boveda de maga trompa— na un cruciforme plan, y rompiendo con el solido masa del maga pared de soporte por maga abierto arco y ventana, disuelto el antiguo estricto division entre cupula, trompa y pared, y ya surgi un infinito diversidad de elaborao interior espacio.

Resumen de maga monumento

Maga monumento del reinao de si Tamerlan

Mausoleo de Khoja Ahmad Yasavi (1389–1399) na Hazrat-i Turkestán, Kazajistán.

Ta queda el maga mas importante conservao timurido monumento na el maga ciudades de Jorasán y Transoxiana y el de ellos maga alrededor, incluio Samarcanda, Bujará, Herāt y Mashhad. Distinguio por el de ellos tamaño el maga monumento del reinao de si Tamerlan (r. 1370–1405). Uno del maga primero importante obra bajo si Tamerlan fue el mausoleo de Khoja Ahmad Yasavi na el ciudad de Turkestán na el actual Kazajistán. Construio entre 1389 y 1399 este enorme funerario complejo alrededor del tumba de un local sufi y musulman santo, si Ahmad Yasavi. Ta conta este mausoleo con un arreglo, sorprendentemente complicao pero racionalmente organizao, de maga habitacion dentro de un rectangular planta.

Maga remanente del palacio de Ak-Saray a Shahrisabz.

Otro maga importante monumento del maga tiempo de si Tamerlan son el mezquita de Bibi Janum y el mausoleo de Gur-e Amir, ambo maga na el de suyo capital, Samarcanda, y el palacio de Ak-Saray a Shahrisabz. Distinguio el mezquita de Bibi Janum y el mausoleo de Gur-e Amir por el de ellos fastuoso interior y exterior decoracion, el de ellos maga imponente portal y el de ellos maga prominente cupula. Representativo de maga cupula na el timurido era, ta reposa el maga cupula na un alto cilindrico tambor y ta tene con un bulboso cupula (i.e. abultao na el maga lado y puntiagudo na el superior parte). Cubierto ellos por decoracion de azulejo, predominantemente de turquesa, y tiene vez ta tene ellos con acanaladura. El Ak-Saray ("Blanco Palacio") fue el palacio de invierno de si Tamerlan, construio entre 1379 y 1396. Hoy visible lang el maga imponente ruina del de suyo enorme puerta de entrada.

El mausoleo Gur-e Amir, que ya servi como lugar de descanso de si Tamerlan y algun maga sucesor, añadio al maga principio del aca-15 aiglo a un mas grande complejo que ya inclui con un madrasa y un janqa, construio al maga final del aca-14 siglo. Ta queda este maga elemento alrededor de un patio con un monumental entrada.

El mezquita de Bibi Janum, construio entre 1399 y 1405, fue na aquel entonces Uno del maga mas grande mezquita del mundo. Nombrao ele por el esposa de si Tamerlan, cuyo mausoleo incuntrao frente a ello. Diseñao como un congregacional mezquita, ya entre ele na ello via un imponente portal que ta lleva a un gran patio rodeao de cuatro maga iwan, segun el tradicional diseño del maga congregacional mezquita del region. Excepto na el lado del entrada, ta conduci cada iwan a un abovedao camara detras de ello. Mucho mas grande y mas elaborao el oriental iwan, que ta conduce al principal sala de oracion, cubierto por el mas grande cupula del edificio. Ademas arreglao simetricamente cuatro maga delgao alminar a lo largo del frontal fachada del mezquita.

Vista desde el entrada del Shah-i-Zinda na Samarcanda (aca-14 y aca-15 maga siglo).

Construio tambien otro maga timurido mausoleo para maga real pariente y maga alto funcionario, como maga más chico y mas tradicional estructura abovedao. Incuntrable manada na el necropolis de Shah-i-Zinda na Samarcanda. Na uso ya este cementerio mucho antes de este periodo, pero ya cae na el abandono, ansina que ya redesarrolla si Tamerlan y el de suyo maga sucesor con este area na un monumental necropolis. Alineao el maga principal mausoleo aqui a lo largo de un estrecho calle y ta conta ellos con rico decoracion, restaurao na el de kanaton tiempo.

Despues de si Tamerlan

Tambien ya construi el maga sucesor de si Tamerlan, masquen de un algo menor escala. Bajo el de suyo bata y sucesor, si Shahruj (r. 1405–1447), ya muda el capital de Samarcanda a Herāt (na el actual Afganistán). Ya revivi ele con el ciudad reconstruyendo con el bazar, renovando con el de suyo ciudadela y construyendo con un madrasa combinao con un janqa. Ya queda el madrasa-janqa un tipo de edificio recurrente encargao por maga posterior mecena na el ciudad.

Patio del mezquita de si Goharshad (1416–1418) al santuario del Iman Reza na Mashhad.

El esposa de si Shahruj, si Goharshad (f. 1457) fue uno del maga mas importante mecena del arquitectura durante el primero mitad del aca-15 siglo y durante este periodo ya alcanza el timurido arquitectura con el apogeo del de suyo sofisticacion. Mayoritariamente incuntrao el de suyo maga monumento na Mashhad y Herāt. Na Mashhad, ya encarga ele con el restauracion del santuario del Iman Reza y el construcción de una congregacional mezquita junto a ello, que ya ocurri entre 1416 y 1418. Ta consisti el mezquita —hoy presente pa dentro del muy ampliao complejo y conocio como el mezquita de si Goharshad— na un patio, de cuatro maga iwan, adosao al santuario. Ricamente decorao ele por maga mosaico de azulejo y por maga elaborao mocarabe sobre el area del mihrab.

El madrasa de Ghiyathiyya na Khargird (Plantilla:Circa), sala de oracion con mocarabe, un boveda de maga tambor y un cupula de linterna.

Destruio o severamente dañao cuanto maga monumento de si Goharshad na Herāt, incluio el de suyo mausoleo y mezquita, construio entre 1417 y 1438 y parcialmente demolio por el maga britanico na 1885. Sin embargo, ta demostra pa el superviviente seccion del mausoleo con el alto calidad del de suyo arquitectonico mecenazgo, evidenciao por el avanzada interior boveda y decoracion. El de suyo arquitecto si Qavam al-Din al-Shirazi, el principal real arquitecto bajo si Shahruj, que tambien ya trabaja na el mezquita na Mashhad y otro maga comision.

El ultimo trabajo de si Qavam al-Din fue el Madrasa al-Ghiyasiyya na Khargird, encargao por si Ghiyath al-Din Pir Ahmad Khwafi, un visir bajo si Shahruj. Segun un inscripcion, completao el madrasa na 1444, pero debio a que ya fallece si Qavam al-Din na 1438, completao el madrasa por otro arquitecto, si Ghiyas al-Din Shirazi. Ta mostra el arquitectura del madrasa con un adicional culminacion de cuanto elemento de diseño. Rectangular el de suyo patio decorao con azulejo, pero ta tene ele con maga esquina con maga bisel. Ta ayuda este maga bisel con el integracion del cuatro maga fachada. Ta tene dos maga camara a cada lado del entrada —uno identificado como un sala de oracion y el otro como un sala de conferencia— con un sofisticao sistema de maga boveda de maga trompa y maga mocarabe, combinao na este caso con un linterna que ta permiti con el entrada de luz.

Fachada del madrasa de si Ulugh Beg al Registán na Samarcanda (1417–1420).

Bajo si Ulugh Beg (r. 1447–1449), ya queda el plaza de Registán monumental conjunto similar al actual. Ya construi si Ulugh Beg con tres maga estructura alrededor del plaza, del que hoy sobrevivi pa el madrasa de si Ulugh Beg (1417–1420) lang. con un gran fachada cubierto por un rico variedad de decoracion. Tambien ya construi ele con un astronomico observatorio na 1420, parcialmente conservao y descubierto por maga excavacion del aca-20 siglo. Originalmente fue un cilindrico edificio de tres maga piso que ta contene con un gigante sextante, un reloj de sol y un pantometra.

Maga remanente de un gigante sextante na el observatorio de si Ulugh Beg na Samarcanda (1420).

Ta ocurri manada nuevo construccion na el segundo mitad del aca-15 siglo, pero ta sobrevivi poco maga al de kanaton tiempo. El sultan Husayn Bayqara (r. 1469–1506), el ultimo significante timurido gobernante, fue un prolifico constructor, masquen limitao el de suyo maga proyecto a Herāt y el maga alrededor controlao pa por ele. Ya crea ele con un vasto jardin, Bagh-i Jahanara, na el noreste del ciudad na 1469. Na 1492–3, ya construi ele con un gran nuevo madrasa-janqa al norte del mausoleo de si Goharshad. Hoy dia ta queda el cuatro maga alminar lang del complejo, masquen ta retene con elaborao decoracion de azulejo, que ta atestigua con el riqueza del monumento. Tambien ya expandi ele con el Azul Mezquita, el santuario de si Ali Ibn Abi Tálib, na Mazar-e Sarif circa 1480. Tambien contribui el de suyo visir, si Ali-Shir Nava'i, al restauracion de manada santuario y mezquita del ciudad, ademas de contribui con un nuevo religioso complejo conocio como el Ikhlasiyya.

Legado e influencia

Muy importante el timurido mecenazgo na el historia del arte y del arquitectura na un amplio parte del islamico mundo. Eventualmente integrao el internacional timurido estilo na el visual cultura del naciente Otomano Imperio na el occidente, mientras que na el oriente ya transmiti el maga mogol, descendientes de si Tamerlan, con este estilo al indio subcontinente. Na Irán, tambien ya hereda el maga safavido con el timurido estilo y ya utiliza conele para desarrolla mas con el de ellos propio imperial arquitectura.

Durante el aca-14 y aca-15 maga siglo, ya domina el oeste del Irán dos maga poderoso turcomano confederacion, el Kara Koyunlu y el Ak Koyunlu. Masquen preservao poco maga monumento por cualquier faccion, ta demostra el maga resto que durante este periodo ya propaga ya el timurido estilo hacia el oeste.